«Көрәйгә барып тоташа тамырҙарыбыҙ»

Хөрмәтле дуҫтар!

Арҡайым ҡасабаһында йәшәүсе, Башҡортостан Республикаһының мәғәриф отличнигы, йәмәғәт эшмәкәре Батыршин Мөбәрәк ағайҙың «Көрәйгә барып тоташа тамырҙарыбыҙ» тигән өр яңы китабы донъя күрҙе.

«Көрәйгә барып тоташа тамырҙарыбыҙ» тигән был хеҙмәт — ысын мәғәнәһендә милли рухиәтебеҙгә, шәжәрәбеҙгә, тарихи хәтеребеҙгә һалынған ҙур өлөш. КӨРӘЙ батыр – Бөрйән ырыуы батыры. Риүәйәттәр буйынса, Көрәй батыр — ғәйәт ҙур көскә эйә, йәйәү аттарҙы ҡыуып еткән, батырлығы менән дан ҡаҙанған легендар кеше. Уның исеме тау-таштарға, йылға-күлдәргә бәйләнеп ҡалған. «Көрәйгә барып тоташа тамырҙарыбыҙ» — беҙҙең тарихыбыҙ, рухыбыҙ, ерһөйәрлегебеҙ, музыкаль мираҫыбыҙ — бөтәһе лә шул боронғо батырҙан, шул көслө тамырҙан үҫкән, тигән мәғәнә сыға. Бөгөнгө заман кешеләре — шул батырҙарҙың вариҫтары.

Мөбәрәк Салауат улы — үҙе лә нәҡ ошо тамырҙарҙан сыҡҡан шәхес. Уның был яңы китабы — шул тупраҡтың һуттары менән һуғарылған. Тирә-яҡта йәшәгән кешеләрҙең яҙмыштары, олатай-бабайҙарыбыҙҙың аҡыллы фекерҙәре, милли ҡиммәттәребеҙ унда сағылыш тапҡан.

Әгәр кемдеңдер ҡулына эләкһә, уны бик ҡыҙыҡһынып уҡырһығыҙ, тип ышанам. Китаптың исеме үк ниндәй тәрән мәғәнәгә эйә: беҙҙең тамырҙар барып тоташа — Көрәйгә, йәғни рухҡа, сәнғәткә, халыҡтың мәңгелек хәтеренә барып тоташа.

Мөбәрәк ағайҙы был күркәм хеҙмәте менән ихлас ҡотлайым! Китабы уҡыусыларға еңел юл тапһын, уны аңлап ҡабул итеүселәр күп булһын. Был китап оҙаҡ ҡына кешеләрҙе әҙәплеккә, туғанлыҡҡа, илһөйәрлеккә өндәһен.